英記火鍋海鮮酒家 (已結業)

自从上一次响「辣蟹庄」同一班好耐冇见嘅朋友聚旧之后，有唔少人提议再约出嚟一齐饮饮食食。一讲到食，我就紧系抱住一于奉陪到底嘅宗旨去「处理」啦。是次食聚嘅地点系友人提议嘅，贪其在区内有点儿历史同埋有不错嘅口碑。连前排上娱乐版头条嘅陶大宇都有嚟，不过佢同埋一班圈外人食饭，唔见有「狐妮」出现，阿陶生当日都冇嚟精神，似乎好受绯闻所影响。「英记」内堂布置简陋，冇乜装修，但店内就人头涌涌，好不热闹。我地少少地四个人，拎住一张点菜纸，你一言、我一语，不费片刻，已经一致「裁定」以下食品必不可少，包括象拔蚌(两食：蚌头做鱼生，蚌身做火锅料)、鳝片、墨鱼滑、肥牛、牛肩脊、鲩鱼腩，当然就唔少得可以吸尽「精华」嘅乌冬啦。牛肉味道偏淡，甚至系友人提议嘅「牛肩脊」都唔系话特别滑。反而海鲜由于系游水嘅关系，食落都有鲜味，如果能够用上海鱼而非养鱼，味道肯定更佳，不过价钱亦可以肯定唔止此数。价钱每人大约两百蚊，虽然同大众代𠮶啲八十几蚊任食有一段价格上嘅距离，但就可以食到一啲新鲜嘅食物，唔驶嗌嚟嗌去都系乜丸物丸咁闷，个人认为可以一试。