塩玉居酒屋 (已結業)

早排放工同男朋友2个人嚟咗铜锣湾食晚饭，其实见网上都有唔少好评所以就嚟食下。夜晚8点几上到嚟，环境唔算好大，有啲暗，但系都坐满人，好彩我哋有book位！叫咗几样嘢食，首先系葱吞拿鱼腩薄脆。薄脆系米通嚟，面头就系葱吞拿鱼腩，味道有少少盐味，几好食，配上下面嘅脆脆口感几丰富！之后就有飞机寿司拼盘，每件都唔同，特别想讲下个海胆寿司，好鲜甜，我男朋友就好钟意鳗鱼蟹子个款。至于黑松露白身鱼薄切，一碟有8件，切得好通透，黑松露放喺另一个碟仔到，想食几多黑松露就自己落！不过个人认为配黑松露有啲盖过刺身嘅鲜味。再嚟黑松露甜虾卷，呢款系我最钟意食嘅，甜虾真系好甜，仲有啲沙律酱同蟹柳，甜上加甜，配埋上面嘅吞拿鱼蓉，我自己就好钟意。最后有2款烧物，烧和牛，烧得好香，嚟到仲系热辣辣，入口即溶，仲有好多肉汁，好好食！旁边有小小柚子汁，不过我哋就无落！另外鹅肝酿鸡翼，其实唔系好食得出鹅肝，只系觉得啖啖肉，同埋入面嘅汁系咬嘅时候标晒出嚟，好邪恶！整体黎讲，食物几出色，可以再嚟！