香港華商銀行公會

营业中

休息中

依家啲人成日话服务差，大家真系要揾个会员然后带队嚟呢间试吓，佢啲侍应个个都好细心好窝心，直头好似屋企人一样，真系好耐冇试过遇到一班咁好嘅侍应生。好啦，跟住讲返啲嘢食，样样质素都好高而且价钱亦都非常相宜，中环食晏饮茶每人唔使$300 ，连埋咁高嘅服务质素，真系超值。虾饺晶莹剔透皮薄馅靓，入面只虾好新鲜又够爽口弹牙。呢个雪山包好似系镇店之宝之一，软熟松化。两面黄肉丝炒面又系高水准之作，虽然肉丝芽菜同埋啲汁淋咗喺面，但系个面仍然系卜卜脆好正。呢个炸墨鱼丸足料非常，一攞到埋嚟直头闻到墨鱼嘅香味，识落唔会成旧都系粉而冇乜墨鱼。呢个虾肠又系不得了，净系块肠粉皮都已经赢晒。我哋仲叫咗杏汁猪肺汤，味道香浓，猪肺加埋瘦肉同埋鸡脚等材料，超正。