鱻88日本料理 (已結業)

今日嚟到呢间离佐敦站5分钟脚程嘅鱻88食Omakase，庆祝朋友嘅生日。果然冇拣错，餐厅服务好、食物质素高！Omakase嘅意思系厨师会根据季节时令嘅食材去，通常都系由冷盘开始上，越浓味嘅食物越后上，全程由厨师发板😋餐厅整个环境都好舒适，十足十系日本，中间有bar枱睇到师傅嘅功架，亦有卡位同房间，有空间安安静静同朋友食饭倾计。一坐低就为我哋准备咗绿茶🍵热辣辣茶味又好香。今日厨师就为我哋准备咗牛油果软壳蟹沙律为前菜，软壳蟹好鲜味，加上油醋汁（橄榄油+黑醋）、新鲜嘅牛油果🥑，非常开胃！跟住上嘅系活海鳗博多，呢个博多上面放咗煎香嘅鳗鱼，下面就系鲜虾胶同芝麻，够晒口感，鳗鱼亦够晒鲜，一啲都唔会腥，好好味接住系新鲜嘅刺身🍣分别系三文鱼、帆立贝同平政，三个都超级鲜😋最后上嘅蒲烧活海鳗鱼丼（三食）绝对系今晚嘅主角，可以选三种食法：单吃、配上葱/芥末/紫菜碎、加上鲣鱼汤，单吃已经好好食，个人觉得第二种食法更能带出鳗鱼鲜味！除咗食物，呢度服务都一流！店员不时睇我哋有冇需要，上每一碟嘅菜式时都细心介绍食物😍埋单人均$450左右，以餐厅同食物质素嚟讲，价钱非常合理，绝对会再嚟！