星點心專門店 (已結業)

成日行开界限街呢边试过附近几间酒楼都发觉无边间特别好食，所以每次都系嚟星点心饮早茶，附近泊位唔多，揸车过嚟都好难揾位，难得咁啱今日过呢边又有泊车位，连平时要等位嘅星点心今日都唔驶等，咁就一定要再帮衬啦。大大话话帮衬过十几廿次，平时要等位无嘢做一定次次喺门口认签名，都好多明星留过名，今日有位直入就唔驶咁无聊喇。每次同朋友嚟一定会一人一碟虎皮尖椒，星点心嘅虎皮尖椒系我食过全港最好味咁济，今日影呢张相个样无咁靓，但食落味道依旧，煎到好香，又唔会太辣。以前有黑松露百花鱼肚又系我必食，但近几个月都转埋餐牌无得再食，希望迟啲会有返，咁就唯有食棉花鸡顶住先，味道都好好，但始终百花鱼肚有旧虾胶食落质感好过食鸡。而肠粉虽然唔系皮薄但馅靓同埋好足料，一夹起实会跌到啲叉烧出嚟。其实so far星点心样样点心都好味道，一食就知唔系啲大陆制嘅预制点心，店心专门店嚟讲算系高质，但奈何间舖太细，又多公公婆婆坐喺度打趸，好多人都唔想排就走咗，九龙城间分店好少少嘅，但希望长远再开多几间分店，等好多人帮衬吓啦。