悅鮨 (已搬遷) 新店位置

要过海办事，顺便俾个理由食餐好...比预订时间早到，餐厅人唔多。可能因为咁，招呼特别好？点咗鱼生饭同寿司定食，再加咗三款鱼生：油甘鱼、带子、池鱼。鱼生先上场：油甘鱼肥美，但味道偏淡。带子好新鲜，并带甜味，池鱼以鱼碎混合葱、(姜？)形式登场，鱼鲜味被抢走晒，出唔到。定食包沙律，不过啲汁比较酸同带点苦，唔系咁欣赏。面豉汤，好足料好够味，不过饮完会口渴㖞。主角先后登场，先讲寿司，size比较细件头，但鱼生几大片。饭仍然系微暖，上枱前已经加咗少少wasabi同少少酱油，新鲜美味！鱼生饭算大份，鱼生好多、饭亦够味。其中海胆，太太同我都觉得系日本本土以外最好食(注：本人俩其实很少食海胆...)。定食仲包乌冬，可热食或冻食，我哋选择咗冻食。乌冬烟韧，不过煮得唔系咁透，乌冬本身冇乜味，但个汁就比较咸。本来唔包甜品，不过最后(老板娘？)送咗雪糕俾我哋。所以有咖啡味同红豆味雪糕食！估唔到超好味...晚餐价钱唔算平，算系对自己好啲！