二少廚房 (已結業)

是日要加班，加完后又黎左呢度食二少，因为想饮啖汤嘛。上次饮过佢嘅鸡汤好好味，呢排少汤水就谂住黎饮啦，点知咁啱卖晒要等下一轮，等左大概半个钟左右先有呀。等个牌子响等得好心急，几时先有得食呢。好嘢，齐哂啦，是晚叫左炖汤捞面。五款手撕鸡中拣左日式麻酱口味，拌上西生菜。麻酱真系好好味，配咩都咁正。鸡肉有咬口带咸香，无筋无骨真系食得好方便，啱哂我呢啲懒人呀。本来手撕鸡系配白饭的，今晚就加左八蚊转做呢个秘制酱拌面，就是粗面加上辣酱花生碎等，微微辣带蒜香好味呀，再倒埋麻酱同鸡黎个大杂烩都唔知几正。上次试过鸡汤，今次就试下莲藕蜜枣排骨汤先。热辣辣原汁原味，入口一阵鱿鱼味，搅下啲汤渣又真系有鱿鱼，哈哈，好浓郁好正，望落有点油，但饮落一啲都唔腻，好好饮。更新左嘅餐牌，面食同饺子餐都系新㗎。仲有多左储印仔优惠添，成日食嘅记得储啦。佢个汤同埋鸡真系好好味，慢慢黎试哂咁多款口味先。