潮福蒸氣石鍋 (已結業)

好开心终于出粮唔使挨公仔面，成班同事都话决定今天夹钱出嚟聚餐喔，半数人都话想食海鲜喔，咪顺下佢哋班友仔意思稳间特色d嘅海鲜店，一搜附近就发现有间潮福蒸气石锅，环境餐具都唔错，海鲜睇落都算几生猛，决定去试下。来到发现真系好多客仔捧场咯，好彩轮到我哋果阵唔使等位，一埋位班飞禽大咬就又话要食龙虾，又话食鲍鱼、石斑果d，真系好似刚放监出嚟咁，服晒！不过大家出嚟最紧要happy喈，最后点咗龙虾、石斑、番薯蚬、花蛤、南非鲜鲍、海中虾、瑶柱鲜淮山粥、蒜蓉肉蟹蒸糯米饭、虫草花蒸鲜鸡。唔食唔知道，一食吓一跳，原来用石锅蒸海鲜可以咁鲜美嘅，上面嘅食物全部比我哋清晒，有d仲抢手到手快有手慢无添。讲下我印象最深刻果几味喇，首先系我几经辛苦先抢到返嚟嘅半边龙虾，加d蒜蓉蒸咗五分钟，出锅之后肉质完全无缩水，睇起来好饱满，蒜香入咗龙虾肉里面，再蘸小小酱汁，入口鲜嫩可口，鲜味一流吖！再嚟就系佢呢度嘅花蛤，蒸好只只都撑开晒，证明真系好新鲜啰，入口爽嫩，无沙无腥味，店家呢方面处理得唔错！最后条石斑同虫草花蒸鲜鸡都值得一赞，就算系清蒸都完全唔影响佢哋嘅鲜味，肉质滑嫩，总体嚟讲班友仔都食得好欢！