香滑咖喱屋 (已結業)

Lunch 有嘢搞, 被迫甩靓女朋友们底 , 搞完只好自己揾地方快快搞掂. 是日饭瘾极大, 无惧「饭气攻心」, 嚟到呢间港式咖喱店试试. 一个人来到好快「摄」到位, 叫了「小辣」「特式咖喱羊肉」(单点 $40) 配白饭 (亦可配薄饼), 9 秒 9 就有得食 先空口呷啖咖喱汁, 果然小辣, 我觉得稍咸, 浓度一般, 不过都几香; 羊较瘦, 肉几腍, 黐住筋膜位的当然较好食, 羊味整体就一般; 薯仔反而仲好食, 软腍粉粉的又沾满咖喱汁, 几喜欢, 可惜得𠮶两旧啦; 白饭较削, 碟头亦比预期细, 不过捞上咖喱汁, 都可以吧. 由于愈食愈辣, 食到最后个口都有点「庆」, 早知加 $7 跟杯饮品啦. 环境系茶记格局, 光猛干净, 人多但唔挤迫; 招呼就又快又准, 伙计阿叔礼貌亦不错, lunch hour 算系咁了.$40 埋单, 可以一试的, 不过如果你好似我咁硬颈, 偏爱浓度及层次感更高的印度咖喱, 呢个咖喱羊就未必好啱你了.