影片
更多
2010-10-13
1802 浏览
湾仔嘅湾景国际酒店，属中华基督教青年会（the Chinese YMCA of HK），但原来佢同尖沙咀文化中心对面嘅香港基督教青年会（the YMCA of HK）又唔同㖞，唔好见YMCA就以为同一个机构，虽然同属一个母会，但各有各做，所以前者简称叫中青，后者就叫港青，除咗个名唔同之外，佢哋个标志都唔同，大家不妨留意吓（提示：颜色方面唔同）。湾景国际酒店嘅湾景厅，一向有做自助午餐同晚餐，收费意向系中下价钱，久唔久晌报纸见佢哋卖广告，一个大人二旧水唔使（自助晚餐），好抵食吓，不过，睇番食评都知，质素只系一般般，如果系讲食好嘢嘅人，点平依度都唔啱你；相反，想试吓自助餐，要求又唔多，仲想悭啲，依度都算系一个选择。最近佢晌阁楼𠮶层Mezz Floor，开辟咗条新战线，原本Mezz Floor算系提供午餐、轻食、或者Happy Hour嘅轻松聚脚点，俾人hea吓嘅地方，最近晌八月开始就试搞埋「假日下午茶自助餐」（星期六、日、公众假期，3:15pm – 5:30pm），定价$98位，以目前大部分下午茶自助餐计，以咁嘅价真系几抵，但系咪超值，咁就要睇有咩好食！事缘8月初从一个饮食网站知道佢首推下午
湾景国际酒店嘅湾景厅，一向有做自助午餐同晚餐，收费意向系中下价钱，久唔久晌报纸见佢哋卖广告，一个大人二旧水唔使（自助晚餐），好抵食吓，不过，睇番食评都知，质素只系一般般，如果系讲食好嘢嘅人，点平依度都唔啱你；相反，想试吓自助餐，要求又唔多，仲想悭啲，依度都算系一个选择。最近佢晌阁楼𠮶层Mezz Floor，开辟咗条新战线，原本Mezz Floor算系提供午餐、轻食、或者Happy Hour嘅轻松聚脚点，俾人hea吓嘅地方，最近晌八月开始就试搞埋「假日下午茶自助餐」（星期六、日、公众假期，3:15pm – 5:30pm），定价$98位，以目前大部分下午茶自助餐计，以咁嘅价真系几抵，但系咪超值，咁就要睇有咩好食！事缘8月初从一个饮食网站知道佢首推下午茶自助餐，并且推出限定优惠，经该饮食网站订位买一送一之余，仲系实价$98两位，无加一，平均一个人唔使$50，饮杯咖啡食件饼都差唔多啦，所以二话不说即订位，都要排到8月尾个星期六先有位。
未去过，唔知咩环境，所以早少少到，侍应亦安排入座，一到3:15pm就提示大家可以出去攞嘢食。虽然间餐厅唔大，靠墙一边用咗摆食物，粗略估计大概放咗50-60个位左右，所以又唔算好逼，装修简单，啡白配衬，无景附送，系招呼方便特别落力有礼。摆食物嘅长枱一眼望晒，老实讲，选择唔算多。
沙律吧
配料只有沙律菜、青瓜片、甘笋丝、蕃茄，而酱汁得两款：千岛汁同油醋汁，所以以量计，算得系基本以下，若以质素计，好彩沙律菜新鲜够冻食落爽脆，其他就一般一般。佢仲有西瓜同哈蜜瓜供应，所以，将个沙律加啲生果就感觉丰富啲，否则，沙律一环就变得只系应酬吓食客而矣！
寿司、冷面
寿司，睇落已经觉得唔系好掂，啲饭望落系机啤出哩，四四正正起晒角，得蛋同蟹柳，仲要用条紫菜卷住佢，件件好似倒模嘅一模一样。仲有寿司卷同反卷，同样望落觉得质素麻麻，索性放弃无试！反而，荞麦冷面有啲惊喜，几好食。
精选三文治
一共有三款：牛油火腿牛角包、酸青瓜咸牛肉法包、芝士辣粉法包，全部做得的的骰骰细细件，尤以酸青瓜咸牛肉法包做得比较出色，全因酸青瓜搭咸牛肉哩个好配合；当然芝士辣粉法包都几得意，朕朕芝士味之下有啲啲辣味，感觉几有趣。
小食、饭面
同样，选择唔多，包括豉油鸡中翼、茄汁香肠、烧卖、碗仔翅、生菜鱼肉、炒饭、即煮云吞生面（或米粉），全部都称得上系普通嘢，不过豉油鸡中翼做得好浓好入味，加碗鱼肉碗仔翅，因见个炒饭普通得好紧要，所以揾师傅整碗云吞面，云吞大大粒馅料十足虾又鲜，面条都几爽口。可能因个饭唔系好掂，所以都唔少人等整云吞面！
精致甜品
之前食嘅嘢都普普通通，估佢唔到嘅系甜品又有番少少水准㖞，而且款式也较多。前前后后出咗有10款嘢，另外仲有即整班戟同杯装雪糕添。小弟觉我好食嘅计有吉士泡夫、红莓芝士饼、芒果芝士饼、三重奏朱古力蛋糕、蓝莓慕丝蛋糕、朱古力慕丝蛋糕，尤其个吉士泡夫同三重奏朱古力蛋糕，前者吉士打得幼滑有蛋香，泡夫焗得够脆；后者底层朱古力蛋糕松软，中层朱古力慕丝幼滑，面层黑朱古力浆味道浓郁。雪糕系Haagen-Dazs品牌，不过只得云喱拿一只味，未能尽兴，我只食咗一杯，就系加落个即做班戟度一齐食，一冻一热。甜品都比较受欢迎，尤其个雪糕，可能啲人想回本，唯有尽情食过够本啦！哈哈！
茶啡自助，无限量添饮。因为地方所限，可放食物嘅种类唔多，但系，补充就做我好快，师傅成日出出入入，未清晒就添加，可能佢哋都知道自己嘅款式较少。不过，我又唔明，既然系咁，可以系补充时转吓款，咁客人就觉得有唔少嘢食，但成个晏昼，都只系补充番原有嘅款式，无新嘢加过。故此，好似我哋早前买一送一兼实价唔加一，真系抵食又超值啦！但如果以$98依个价位，只系食以上嘅嘢，感觉有啲贵，始终大部份都只系普通嘢！唯一系依家做紧三送一，即系四个人去食，俾三个人钱，拉匀平均$80左右；或者个别信用卡签帐，就$88位，仲免加一，都勉强可以考虑吓！
张贴
