九井食堂 (香港仔中心) (已結業)

喺香港仔中心入面有间CP值高嘅日本餐厅九井食堂。九井杂锦刺身丼：呢个杂锦刺身丼嘅刺身嘅款式众多，包括有油甘鱼，三文鱼，牡丹虾，原粒鲜带子，三文鱼籽，海胆等，分量十足，而最欣赏就系入面嘅三文鱼同三文鱼籽，佢哋嘅口感爽滑又带有劲道，卖相味道兼备。呢度仲可以加钱转套餐，套餐包左味噌汤，沙律同埋茶碗蒸，真系非常丰富。九井日本蚝海鲜锅：呢个海鲜锅自己拣汤底，我呢次系拣返左寿喜烧，佢哋嘅汤底调味得宜，唔会太甜或太咸，可以食得到食物原有嘅鲜味，更能带出海鲜锅中嘅海鲜鲜味，而海鲜锅嘅用料都好丰富，分别有虾，青口。广岛蚝，原粒带子，鱿鱼，蟹棒等等，仲有不少嘅配菜，令到汤底更加鲜甜，最啱用嚟配弹牙嘅稻庭乌冬。手卷叫左两个分别系海胆手卷，软壳蟹手卷，海胆嘅份量好多，又够哂鲜甜，而软壳蟹即叫即炸，大大只咁拎嚟包手卷，两个手卷都令人好满意。