香湘辣妹 (已結業)

之前经常嚟黄埔食川菜，原来都有一间食湘菜，所以揾日下午嚟试下。餐厅系快餐店格局，当时餐厅都有好多枱客，但唔知点解半间都无开灯，好环保...我哋拣近门口窗边位置，所以无开灯都好光猛。等咗一阵先有店员出嚟落单，我估餐厅系无咩人手，好在𠮶日唔赶时间可以慢慢食。我哋点咗一个午餐小炒牛肉木桶饭，辣子鸡同埋孜然牛肉。孜然牛肉系用铁板上，一上枱就好香孜然味，呢阵味闻落好似喺深圳食到嘅味道。牛肉表面好多孜然粉，食落好香孜然味，少少辣，属重口味之选，好适合送饭，而且牛肉份量都好多。辣子鸡同平时食嘅唔同，平时系辣椒多过肉，揾鸡肉食好似寻宝咁。呢间嘅辣子鸡肉唔会太碎，食落好够麻辣除咗辣椒仲有落咗蒜心粒同花生去炒，除咗令卖相更靓，蒜心粒爽脆食落辣辣地都好好味。午市嘅木桶饭每日有几款拣，我地点咗一个小炒牛肉木桶饭。估计系即叫即蒸所以都等得比较耐。牛肉有牛味无松肉粉味，味道似屋企食到嘅味道，牛肉无走过油所以就唔算滑，配埋尖椒同唐芹几好味。份量方面都算多，难怪咁多人嚟买外卖。总括嚟讲食物质素唔错，好似喺深圳食到嘅味道咁。但服务方面有待改善，至少楼面要长期有至少一个人比较好，一系唔好收加一服务费。