新仙清湯腩 (已結業)

星期日无啦啦都要番工真系好唔开心，咁啱喺湾仔附近做完嘢，就打算同同事医埋肚先番屋企。同事系呢间餐厅嘅常客，所以佢话一定要带我嚟食。反正我都无咩主意，就顺从佢嘅意愿。入到去先知原来呢间餐厅来头唔少，除咗蔡澜推介之外，仲系米芝莲嘅推介！虽然见到有好多推介嘅美食，但做完嘢真系无咩胃口，所以只系点咗个常餐——镇店牛双宝汤河加冻柠茶。冻柠茶好快就嚟，除咗够冰冻之外，柠檬味同甜度都适中，即刻醒神晒！转眼间，镇店牛双宝汤河都嚟埋～啲牛腩嘅卖相已经好吸引，成碗面食落去更有惊喜！汤底应该系用咗萝卜嚟煲，所以好清甜。真系清甜到唔太肚饿嘅我都连汤底都饮晒！河粉唔会太林，配埋啲清甜汤底，真系斋食面都够！至于啲牛腩，睇落去已经见到一丝丝咁，觉得唔会韧，食落去真系！而且林得嚟都好有咬口，仲要肥瘦度适中，牛味好浓！最后食连蔡澜都赞不绝口嘅云吞，果然无夸大，一咬落去已经觉得好香口，真系同出名嘅云吞面家有得比！至于同事食嘅金牌咖哩薯仔三宝饭，虽然我无份食，但都闻到好香好浓郁嘅咖哩味，下次有机会一定要试下先得。