Chitose (已結業)

今日又去开长沙湾𠮶头，上网见到有一间新餐厅，价钱又唔系贵㖞，咁就入去试吓好唔好食。由于我哋两个人都好肚饿嘅关系，每人叫左一个主菜之后，再叫左三款小食，免加一买单＄300都不用，抵食。芝士汁意粉见每个食过都话好食，就点左吉列鱼柳芝士汁意粉$60，鱼柳刚炸起够热，意粉捞埋个芝士汁一齐食，真系好夹。烧春鸡配意粉＄88 ,真系有成半边鸡，鸡腿连鸡胸份量都不小，鸡腿肉够滑口，有肉汁，意粉汁有少少辣，同外面既有点不同，捞理意粉好夹。招牌泡菜$20，上面洒左紫菜，似日式味道，泡菜辣度刚好，我哋抢着食添。白咖喱青口＄48/4只，上面有小小洋葱同蕃茄调味，觉得咖喱汁好入味，配碗白饭一流，青口大大只，一人两只啱啱好。本身谂住系鸡软骨，但系啱啱好卖晒，所以就转左点炸鸡翼，＄32/4只，炸到好香，而且唔会油腻，但略嫌味道淡左少少。朋友就加左＄32点左芒果热情果沙冰，劲大杯，饮落去有淡淡热情果嘅味道，第一次试呢一个组合，系唔错嘅推介之一。