龍門棧 (已結業)

早几日同妈咪喺湾仔行街，见就快母亲节就请佢食一餐好既。呢间茶楼名不经传但就喺openrice见好评如潮，试一试果真唔错。我地除左食炒饭以外都试左不少点心，全部都是以新派方式料理，无论系卖相或是味道都与别不同。我自己会推介松露野菌饺，平时食既水晶饺馅都是淡而无味，但呢道野菌饺一咬已经香气四溢，菌香爽口，而且松露味十足，但又不会太过龙。另一道系鸡扎，虽然相对比较贵，但物有所值。鸡扎睇落卖相同平时相差无几，不过内有干坤，看似入面是平时既蟹柳鱼肚，里面原来系准山花胶同芦笋，非常高档，而且食落味浓而不腻，虽然材料不一样但同样夹和入味。仲有一道系见好多人都点既啤梨咸水角，外皮酥脆，一食就知系即叫即整，妈咪仲话好似有少许啤梨味，不过我自己就唔多觉。平时我唔太钟意食咸水角，因为感觉太油腻，呢道完全唔油，仲好香口，内馅亦丰富，真系颠覆左我对咸水角既印象。总括而言，呢度虽较贵但物有所值，要试一啲精致点心呢度系唔错既选择。而且水滚茶靓环境优雅，好岩一家人黎叹茶，享受一个美好周末。