鷹巢

营业中

休息中

同屋企人去食饭，都想坐得舒服啲，食得开心啲。 今晚就去咗 鹰巢 食饭，预祝母亲节。我哋预订咗 澳洲龙虾尝味海鲜套餐，非常丰富。一开始先有几个小食：冰烧三层肉、蜜汁脆鳝同埋叉烧皇。我想讲冰烧三层肉真系好香脆又够味；叉烧王用咗半肥瘦猪肉，肉质软冧；最好味系蜜汁脆鳝，皮脆肉嫩，起晒骨啖啖肉，好味道！芝士焗蟹盖好啱小朋友食，大量蟹肉同芝士捞埋一齐，放喺蟹盖上面，好睇又好食。原个椰皇花胶炖鸡汤好滋补好好饮，椰子味好香，入面仲有螺头同花胶，好足料！之后就到重头戏：碧绿彩椒炒澳洲龙虾球😍 呢个菜式摆盘好靓，色香味俱全！澳洲龙虾球肉质鲜美，龙虾肉结实爽口，轻轻调味已经好好食😋😋😋 大啖大啖龙虾肉咁食真系好正，非常满足～玉梨带子系一个口感同味道都好丰富嘅菜式，香梨垫底解肥腻，上面系炸咗嘅带子同虾胶，带子都好厚肉👍🏻妈妈最钟意食荷香云腿蒸龙趸球，分量十足，龙趸好新鲜，好有鱼味，无乜骨，配咗少少金菇味菜等等调味，几好食。食完咁多𩠌之后仲有南乳吊烧鸡同蟹肉伊面，呢个套餐真系好丰富。最后仲有枣皇糕同埋红豆沙，大家都食到饱饱的。呢度环境幽静舒适，下次同屋企人食饭都可以再嚟呢度！