尚夢・茳煳 (已結業)

一家人黎到湾仔嘅尚梦 •茳煳食晚饭，依间餐厅主打新派精品中菜，亦有一系列经典怀旧菜式同功夫菜。餐厅都展示左好多有趣嘅装饰，可以一边食饭一边欣赏。餐前两款炖汤雪梨同螺头汤都非常足料。宫廷香烤骨肥瘦均匀，煮到够淋好入味，酱汁带点微辣，加埋个菜一齐都好好食。上枱时店员仲会帮手将香烤骨分件，方便进食。香煎龙趸球平时龙趸就食开蒸，估唔到煎又几香，火喉控制得唔错，煎得金黄，啖啖鱼肉，鱼皮又弹牙。脆皮牛脸肉外皮炸得超香脆，入面嘅牛脸肉超嫩滑，可以话系我食过最滑嘅牛肉，入口即化，非常惊喜。终极小炒皇韮菜同虾干鱿鱼等配料炒埋一齐，炒到好香好有镬气。一啖接一啖，送饭食一绝。茳煳炒饭 炒饭有咸蛋杞子等配料，炒到金黄色，食落咸蛋黄味都好出好香，就咁食都唔会好单调，味道丰富。桂花咸鱼蓉炒米粉米粉炒到干身，咸鱼味唔算突出，带点点咸味，就咁食都唔会太浓味，同埋其他𩠌一齐食就刚好啦。最后嘅桂花糕亦散发淡淡嘅清香。无论系玫瑰花茶定每盅汤，都见到有个烛台保温，就知道餐厅都好重视食物嘅质素。想试下有质素而又价钱合理嘅中菜，就可以黎试下啦。