上品火鍋料理 (已結業)

地点几清幽~ 告士打道望海~ 可惜唔系坐𥦬边。环境唔错，通风设施做得唔错，咁多枱人地方唔算大都可以唔觉有边炉味。间野都系中上质素，平凡嘅唔讲净系重点讲啲抵赞㗎啦！点完汤底同料之后，翅上先。平时有去深水埗食开一间鸡炖翅，估唔到火锅地方都做到𠮶啲质素，证明足料好紧要 :0 响铃应该喺呢度自己整，即叫即炸，色水比平时𠮶白净啲睇落冇咁油腻，点红色杰杰地𠮶啲醋汁一咬不得了，松化到化埋我个人，秒清后encore咗。海鲜拼盘有即㓥嘅鱼，生蚝，圣子，虾同埋好多膏嘅蟹。条鱼生猛到起咗肉之后仲fing嚟fing去，好惊！虽然系好事嚟，d鱼片真系好鲜甜，同平时雪藏住嘅冇得比。啲虾又大只又涨卜卜，壳易起，都系罕见嘅新鲜虾～条鱼啲头头尾尾侍应问我地要椒盐定系掉埋落去煲，梗系拣椒盐啦！又椒得好好食㖞，分唔到佢沾咗d咩先炸，唔觉有炸粉但又唔系日本料理𠮶种会𠝹损口嘅炸鱼头，好正！食到爆疮都抵！粉丝都系值得一赞，未渌前比较直身同硬，所以渌完唔会淋哂散哂，仲维持返一条条唔会变咗一pat pat，又有弹牙嘅口感，同时又吸得返啲汤味，满足哂！