神輿日本料理 (已結業)

有次上网见到神舆呢间啲装修好日本风好靓，加上好耐冇食放题，就同老公星期五晚放工黎试吓，我哋订咗7:30，一去到就即刻安排入座，侍应姐姐亦都即时介绍甜品可以喺出面攞，仲好贴心咁送上两杯热茶。坐低即刻叫咗一盘刺身，有甜虾带子象拔蚌螺等等，全部都好新鲜好鲜甜，数量又足，最开心嘅系有海胆寿司/手卷，同埋入口即溶的和牛寿司！！其他烧物同炸物都几唔错，尤其是啲串烧，盐烧鸡肾同黑椒豚肉串都好香口，叫完一转要再encore！食完啲细件野我老公叫咗稻庭乌冬，而我就口痕叫咗个牛肉寿喜烧，个汤底好甜好味呀，细细个份量好够我食！到甜品时间，雪糕就一定要食红豆味同绿茶味，𠮶度仲有好多配料俾你加，可以整到靓靓先返埋位食！另外值得一推嘅系木糠布甸同埋北海道牛奶布甸，超滑又香牛奶味，同老公食完一转又一转，两个人饱到捧住个肚回家！总括来讲呢度坐得又舒服，服务又好，下次会约多几个朋友一齐嚟！