鮨和居食屋 (已結業)

成两年无返过家乡啦，老公为咗一解我思乡愁，特登带我去一间靓靓日本餐厅叹鱼生。 餐厅好宁静好舒服，可以静静哋倾下偈。 刺身样样都想食，最后拣咗个厨师发办唔使烦恼，厨师发办刺身拼盘有白拖罗，鲽鱼，吞拿鱼腩，牡丹虾，油甘鱼，法国圣马田生蚝，全部都好新鲜，尤其拖罗油脂感重，非常好味。 生蚝新鲜肥美。烧荣螺用透明碗盛载，个底用咗蓝海盐，荣螺入面有上汤，冬菇粒，芫茜，味道鲜甜。 油甘鱼头煮系店员大力推介，我自己从未试过呢个菜式，不过出奇地好味，鱼头充满酱油、味醂嘅甜味，油甘鱼头油脂感足够，萝卜吸收晒所有精华，非常鲜甜入味。 特上三色丼卖相吸引，未食之前眼睛已经食饱先，有鲍鱼、吞拿鱼籽、碎香葱吞拿鱼，有三种唔同嘅层次，米饭系用日本珍珠米，粒粒都饱满有光泽，口感软糯，米香十足。