幸屋

营业中

休息中

港岛区食店林立，而且犀利在就算系横街小巷嘅餐厅，都有卧虎藏龙嘅高手存在。上个星期，我有个前辈带我去食饭，佢带咗我去一间位于湾仔小巷入面嘅拉面店。呢间舖头的确系好低调，低调度你好有可能行过咗都唔知。前辈嗌好咗嘢食之后，我哋倾咗一阵计，好快食物就上枱喇。首先上菜嘅系「蟹籽沙律」。呢个沙律一啲都唔马虎，你睇吓，系满满嘅沙律酱同蟹籽呀！之后上枱嘅系「和风炸鸡」，外脆内嫩，仲有啲肉汁漏出嚟添，而且炸浆唔会太厚，睇嚟师傅嘅功力都有返咁上下。跟住上菜就系我嘅「广岛蚝沾面」，沾面系日本拉面嘅一种，特点系汤汁同面条会分开，将面条蘸汤汁食用。一般嚟讲，沾面嘅汤底比较浓稠，似汁多过似汤。呢度嘅沾面都系一样，将比较结实而富有弹性嘅面条放入去浓味嘅汤汁入面，一拉上嚟所有汤汁都挂晒喺面条上面。面条避免咗浸得太耐而变软，同时浓厚嘅汤汁又带嚟强烈嘅味觉冲击，简直系完美。千祈唔好漏咗啲广岛蚝，只只都好肥美，只只都蚝味浓郁。而前辈食嘅就系「蒲烧鳗鱼丼」你睇下啲鳗鱼几咁厚身，前辈话呢度啲鳗鱼味道偏重，但系同时又够肥美，非常难得。最后一定要多谢前辈带我嚟呢度食呀！