餃掂手工餃子雲吞專門店

上次食过荔枝角间分店，咁啱今日去太子始创𠮶边买嘢，见到呢间饺掂快线，谂起上次食完觉得几高质，今次同朋友又再食多次。今次encore番龙凤松茸汤饺，野生松茸剪素饺，一份上汤松茸时蔬，饮品叫咗一杯冻蜂蜜柠檬薏米同一杯热嘅自家制山楂雪梨。总括嚟讲佢啲饺子皮薄馅靓，份量偏大只嘅。堂食仲有腌萝卜食，同埋都有两款酱拣。食物质素都系咁好食，先讲个龙凤松茸汤饺，咬落去啖啖肉，分汤上，但系唔系烚到干身，仲充满肉汁，连埋啖汤去食，充满咗肉汁同埋松茸嘅味道。另外煎饺都系咁好食，真系好钟意食素饺，佢嘅馅料都好充足，食到有唔同种类嘅蔬菜，超健康。饮品方面，两杯都饮得出系健康同养生，啱晒秋天滋润身体。