The Socialhouse (已改名) 查看

朋友话大坑附近多嘢食，所以专登过去行吓，咁啱见到呢一间西餐装修好外国咁好舒服，再望吓平时啲食评好似都唔错，所以就入嚟试吓。坐低冇几耐就上咗个面包，热辣辣好重香草味，加埋啲橄榄油同醋好好食。跟住就到无花果沙律，啲菜好新鲜果仁又好脆口，仲有好多新鲜无花果，平时都系食开无花果干，原来新鲜无花果都好鲜甜，配埋果仁同啲菜，非常夹。之后就到主菜，西班牙乳猪仔，同其他食评讲嘅一样，乳猪皮又薄又脆，超香口，同平时食开嘅中式乳猪好唔同，一啲都唔肥腻。同埋叫咗呢个乳猪仔有个promotion，叫黑啤可以买一送一，个黑啤好绵滑，好易入口，配乳猪仔食一流。另外一个main course 就叫咗纽西兰羊膝，炆得好腍，好香羊肉味，如果冬天再冻啲食就perfect，本身想叫个甜品，不过食完两个肉好都够饱，但见到隔离枱生日有个拿破仑好靓，唯有留返下次再过嚟食。