三日月

营业中

休息中

朋友话三日月铁板烧质素高，强烈推荐，于是星期六午餐过嚟试咗两款lunch set，有特价，几抵食。茶碗蒸好有惊喜，加咗铿鱼高汤同埋鱼子，味道鲜甜，蒸蛋超级滑，加上木耳丝，好好食。龙虾好弹牙，将精华虾膏拎咗出嚟做酱汁，味道香浓但唔会咸，忍唔住连酱汁都𢳂晒嚟食。白鳕鱼伴蚬汁，面头系法式杂菜，蚬汁醇滑，酱汁创新得嚟味道又balance得好，睇得出好有心机整，系花咗工夫。另外仲有巨型虎虾，同样系拎咗虾膏，酱汁比龙虾更香，居然连虾须都食得，煎到香脆。牛肉分别系A4鹿儿岛和牛同美国Prime肉眼，牛肉包咗杂菜，生熟度控制得好，牛味香浓，配上杂菜中和油腻。龙虾头仲攞埋去煲汤，面䜴汤底之上加埋龙虾嘅鲜味。炒饭用咗日本酸梅酱﹑樱花虾同白饭鱼，另外配咗铿鱼汤做茶渍饭，一饭两食。炒饭粒粒分明有光泽。另外仲有抺茶红豆糯米滋，今餐食得超满足。我觉得三日月最正嘅位系，佢谂到唔同嘅酱汁配搭新鲜嘅食材，令味道好有层次同惊喜。当日坐咗bar枱位睇住师傅料理，餐厅都有几张大枱同大房，啱朋友聚会。员工好有礼貌同尽责，有简介菜式同食法。