貊炙

营业中

休息中

揾到间环境舒适嘅高质韩烧同朋友庆祝生日，职员态度非常友善，全程帮手烧肉唔使自己操劳，食完仲冇成身油烟味👍🏻前菜有五款，泡菜好好食，味道香浓又唔会太咸，食完亦可以refill。酱油盛盒有大虾、带子同八爪鱼，估唔到大虾有咁多膏，好鲜甜！盐砖和牛西冷扒超大块，我哋拣左半成熟，烧好嘅和牛放喺盐砖上，等3分钟就食得，和牛油脂均匀，牛味香浓，带有少少咸味，如果想咸啲可以放耐啲喺盐砖上。庆洲黑毛猪盛盒有猪梅肉同猪腩肉，另配有生菜、紫苏叶、生蒜同青椒。黑毛猪猪味浓郁，配以唔同酱汁（柚子酱油，洋葱豉油同芝麻盐）同各款配料包生菜一流。海鲜煎饼份量比想像中大，趁热食够哂香脆。同朋友每人叫咗杯嘢饮，青瓜青柠梳打同西柚乳酸梳打，饮落唔会太甜，酸酸地好开胃。食完韩烧点少得甜品，蜜糖牛奶软雪糕好香滑，重奶味，超大杯，食完够晒饱。