Plato Cafe & Bistro (吳松街)

难得约朋友出嚟聚吓旧，决定拣间好啲嘅餐厅，见网上评语都唔错就拣咗呢间，系一间性价比好高嘅西餐厅！我哋拣咗个二人餐（$546），有西班牙风干火腿伴哈密瓜沙律、炭烧澳洲肉眼牛扒同埋西班牙黑毛猪鞍。今日嘅餐汤系南瓜汤，饮落好滑好香浓，而且冇南瓜丝，我自己几钟意。而前菜嘅风干火腿伴蜜瓜沙律，咸咸地嘅火腿配埋清甜嘅哈密瓜，非常开胃，哈密瓜食得出系好新鲜嘅，好爽口好甜，同火腿好夹。我哋嗌咗七成熟嘅牛扒，净系见到卖相已经觉得好吸引，牛扒嘅熟度啱啱好，仍然可以见到中间嘅肉系鲜红色嘅，咬落好软熟，肉汁都锁晒喺牛扒入面，啖啖都爆汁！而黑毛猪鞍同样出色，有成差唔多两寸厚，超级抵食！肉汁都系锁住晒喺猪扒入面，净系切块猪扒啲汁都爆晒出嚟，口感软熟爆汁，十分回味！两碟扒都配有一个焗薯同埋沙律菜，一定唔惊食唔饱！另外我哋都嗌咗杯特浓朱古力同埋焦糖朱古力，两杯朱古力味都好浓，饮完淡淡朱古力味仍然停留喺口入面。最后甜品可以拣芝士饼同埋Movenpick朱古力雪糕。呢个价可以食到呢个质素嘅西餐，绝对系好抵食，性价比之选！