雲魅 (已結業)

雲南米線相信香港人對呢個名詞一啲都唔陌生，但呢個將啲餸放响九宮格咁裝起同用一個特式大砂鍋裝住熱辣辣嘅湯咁食你又試過未呢?今日嚟到坐落响旺角彌敦道726號18樓嘅 「雲魅」新派雲南米線，呢到嘅午市套餐$88就有一盤雲南米線，前菜，同飲品。我哋試晒兩款湯底；雲魅特色湯同雲魅蕃茄湯，同兩款麵條七彩麵同米線；前菜就揀咗傣族手撕鬼雞。其實傣族手撕鬼雞即係芫荽檸檬手撕雞，個份量好大兜，味道帶點酸辣，幾開胃。之後主角一盤有11樣嘅米線配料上枱好吸睛！有傳統昆明風味酸菜、炸醬、鵪鶉蛋、午餐肉、酥肉、番茄仔、粟米、響鈴、魚片同芫荽，隨後熱呼呼嘅砂鍋湯伴隨，職員叫我哋先將肉及蛋放入內，再加配料同麵條後即可享用。蕃茄湯底味道偏甜，加埋爽滑嘅米線連同配料超大碗。而特色湯有些少微酸辣，配上似麵線質感嘅七彩麵都真係幾有特色！呢到環境舒適，响咁熱鬧嘅旺角都搵到一個寧靜舒適可以慢慢享受食物遠離煩囂都不失為一個好去處。