南記粉麵 (福苑)

营业中

休息中

幾年冇食南記粉麵,最近兩公婆同朋友响旺角行完街,決定食南記做晚餐,老婆叫咗"雙拼有營套餐",係魚肉春卷加貢丸河粉,個餐配咗一碟疊到好高嘅蠔油生菜,所謂"有營套餐"嘅有營所在應該就係指哩碟生菜,$40一個餐算係幾抵食。我自己就點咗"魚肉春卷牛腩蕃茄濃湯米線",蕃茄濃湯對辦夠濃郁,酸甜適中,我幾乎飲晒咁滯,牛腩就稀少咗啲,但係我朋友嗰碗啲牛腩就又多又大舊,食麵啲牛腩都少過人,唔通連個天都唔鍾意我。朋友叫咗碟魚片頭小食同我分享,竟然係全晚嘅亮點!非常爽滑彈牙!一試愛上!每次去南記都一定會叫魚肉春卷嚟食,講真唔係咩驚為天人嘅美食,但係就好似一個習慣一樣,自自然然就會叫春卷食,究竟點解呢?可能係一份親切感,我同南記春卷已經成為咗老朋友。