小漁港海鮮舫 鮮蒸‧鮮味火鍋

营业中

休息中

10/9因为同亲戚庆祝生日，所以走左去呢间。环境格局似小型旧式渔港主题酒楼。环境干净整齐，服务都ok。当时叫左398/1位嘅套餐，2人起跳。有几多野食下，包括刺身，龙虾，濑尿虾，海虾，马友，元贝，鲍鱼，贝壳3款，蔬菜，鸡乌冬同粥，份量几大下。首先系个刺身，鱼同带子冇乜特别，但系个主打象拔蚌系好明显新鲜手切，清脆爽甜，会有少少海腥味，所以对鱼腥味敏感嘅人有可能觉得有啲难受。然后服务生会上开始蒸海鲜，当中龙虾可以食到佢嘅鲜甜味，再配有佢独有嘅海咸味，肉质超爽脆。濑尿虾嘅话会比龙虾冇咁爽，不过虾身小孩手臂咁长，味道比龙虾更加清甜，壳软易剥，啖啖肉，连虾钳都有肉可以食。元贝同鲍鱼反而冇乜特别，鲍鱼比较淡口冇乜味，元贝正常。反而螺，花甲同蚬几正下，无配料原味蒸，但系可以食到完全冇砂，仲要非常新鲜，有独有贝壳嘅鲜甜得呢仲有海咸味，口感个个都系超弹牙超新鲜。粥嘅话又系重点，因为长时间煮，所以一出炉会系似潮州粥，非常黏口，而且因为有一堆龙虾头放入去一齐煮，所以会非常有虾膏味。整体来讲非常推荐，最好约三两个人一齐食会比较好。