富臨酒家 (燒鵝大王) (已結業)

放工已经九点几，大家都肚饿，一于就近近地同班同事去鲤鱼门食饭。去鲤鱼门就梗系食海鲜架喇，咁啱就见到富临酒家，一于就食佢。入到去已经feel到呢间同其他分店有分别，落咗心机去布置到有鲤鱼门风味。叫咗个海鲜餐，一嚟就有只招牌烧鹅髀，皮脆肉嫩。之后有三虾，分别系白灼生虾，椒盐赖尿虾同芝士焗龙虾。白灼生虾就鲜甜，椒盐赖尿虾真系好正，香口之余又入晒味。芝士焗龙虾就唔会好腻，份量适中。食完已经有少少饱，点知高潮一波未完一波又起。原来仲有蒸鲍鱼，蒸龙趸件同蒜蓉粉丝蒸带子。食完啲浓味嘢，食返啲清清地嘅都唔错。鲍鱼鲜甜，有好香嘅果皮味，龙趸嫩滑好香，蒜蓉粉丝蒸带子捞饭一流。最后仲有三碟炒嘢，豉椒炒蚬惹味同有少少辣，炒蟹大大只又香口，仲有蒜蓉炒菜添。大家已经食到揽住个肚，点知仲有迷你珍珠鸡同甜品! 珍珠鸡用红米够晒健康，返去真系要做下运动先得啦。。。真系好抵食！