漢斯 (已結業)

次次经过HANS都好多人等位, 一直无机会试, 今日终于试到啦。午餐有十款俾你拣, 猪、牛、鸡、海鲜都有。值得留意系餐牌最底标示" # 欢迎加减饭面量 ", 店主唔怕麻烦, 鼓励大家有衣食, 值得大赞呀。如果字句显眼啲就当然更加好啦。第一次嚟, 就试下厨师精选 - 椰汁咖喱牛肋骨饭啦。我对咖喱饭嘅卖相从来无咩要求, 一旧白饭配一堆啡色酱汁能有什么卖相。但呢个咖喱饭一上台！有惊喜！金黄色椰汁咖喱配白饭, 加上四款唔同颜色嘅蔬菜, 健康又好睇, 看似简单嘅一碟饭, 尽现厨师嘅心思。果然味道亦无令我地失望, 牛肋骨软滑入味, 上碟前仲已经起埋骨, 最啱我呢啲连骨都唔想拆嘅懒人。咖喱汁带浓郁椰味, 甜甜地, 唔会辣, 配白饭一流呀。朋友叫嘅叻沙都非常唔错, 汤头鲜味, 唔会过咸, 面底混合咗油面同米粉, 呢个配搭令到成碗面嘅口感更有层次一。呢两个餐份量都唔细㗎, 男仔就应该食得晒嘅, 但我地两个女仔就两个都食唔晒, 下次嚟一定要记得叫少饭 / 面, 咁就唔怕浪费啦。