越風味地道越南料理

营业中

休息中

晚餐谂唔到食乜，所以上OpenRice睇吓附近有乜食，见到呢间越式菜评价好高，所以入咗去。所拣嘅嘢都系大家热门推介嘅。鲜茄蟹肉汤"Banh Da"粉, 真系第一次食，之前从来听都未听过。有蟹肉嘅鲜味同非常香浓嘅茄味，所有配料都非常之精致，仲有软壳蟹脚一件。未食过嘅，点都要试吓。不过今日好热，未感受到佢嘅精髓。猪颈肉捞檬嘅炸猪颈肉都算冇得输，粉红色嘅猪颈肉非常嫩滑，外面炸得香脆可口。因为天气热，所以想食捞檬。但系呢碗捞檬加埋个汁，都系有暖暖哋嘅感觉，做唔到解暑嘅效果。檬粉嘅质地有啲似米粉。如果花生同干蒜片多啲就好啦。牛油果沙冰系大家推荐嘅，而我又好钟意牛油果，所以一定要试。牛油果味都算唔错，最好嘅地方系非常之滑。不过可能因为平日饮开更多更好嘅牛油果饮品，呢杯嘢唔算突出。同埋天气好热，作为一杯沙冰佢唔够冻。可能落去嘅时间比较多人（晚上7:30）、坐得唔算好舒服。张枱好细，好迫。