麵屋 元祖達摩 (已結業)

由铁路站行过嚟，无几耐就嚟到新开无耐嘅面屋元祖达摩。一走入去，就见入面摆咗大大小小嘅日本达摩公仔。同大部份拉面店一样设有吧台，另一边就系一排二人台。台上面摆咗调味料例如有白芝麻、七味粉、酸姜、柠檬汁，同埋加咗柠檬片嘅冻水，仲有提供纸巾，都几细心。呢度系用画纸仔嘅方式叫嘢食，拉面可以拣面条嘅硬度、汤嘅浓度，另外亦可以拣要唔要葱、笋、蒜蓉同香味油。我除咗笋之外，全部拣咗要。试咗期间限定嘅北海道3.6牛乳黑松露蟹肉拉面，炙烧豚肩叉烧、炙烧豚腩叉烧同紫菜晌碗边整齐排列，中间仲放咗一堆松叶蟹肉丝、蟹籽同黑松露，睇起嚟好丰富。汤底加咗北海道3.6牛乳，浓度拣咗普通，汤色奶白，饮起嚟有淡淡牛奶同蒜香，唔会过份咸重。随后将松叶蟹肉丝、蟹籽同黑松露捞匀，令整体多咗份鲜甜。面条硬度拣咗普通，口感幼细弹牙。炙烧豚肩叉烧，餐牌写用咗西班牙黑毛猪上肩，切得稍薄，咀嚼起嚟几松化。炙烧豚腩叉烧，用咗鹿儿岛五花腩，相对嚟讲比较厚身，入口有焦香同油香，两者之中我比较钟意呢款。配料方面有本菇、木耳、粟米同葱，蔬菜量比其他拉面店多，整体好有咬口。樱花水信玄饼已经唔系新鲜事，但系晌拉面店发现佢嘅踪影都系第一次，于是叫嚟试试。