丼丼亭 (已結業)

可能因为港铁黄埔站开通，平时啲饭堂都排晒长龙，唯有行远啲揾食啦，去到比较静嘅黄埔第三期，有间丼丼亭门面有啲吓人，睇真啲价钱原来好鬼亲民，咪入去试吓啰，D天妇罗丼呀D乌冬定食呀六七十蚊有交易。第一次试，食好啲！叫个松叶蟹梅子海鲜㶽，加$48追加安格斯肥牛（可任加几多份都得），豚肉苦瓜釜饭，两杯抹茶红豆。个海鲜锅汤底加入梅子，酸酸地几特别，啲蟹都算鲜甜好肉，牛肉有水准（图中只系半分），至于个苦瓜釜饭，啲苦瓜就应该唔系日本种，不过煮法就好日式，杯抹茶红豆都几好饮。等嘢食期间睇吓本Menu，原来间野喺日本引入，个别食材都系日本运过来。值得一题系天妇罗可以续份叫由＄12两件起，想嗌两份试吓但怕食唔晒嘥野下次再试。食完买单三旧几水？咩有折咩？竟然唔收加一咁又着数㖞。间野唔会话到佢五星级水准，但就绝对对得起个价钱，如果平时两个人两定食两野饮，都系两旧水我觉得超值啦，以后又可以多间饭堂。