A.T.A.S

营业中

休息中

突然想食啲好濃味嘅嘢食…銅鑼灣嘅”A.T.A.S”，食嘅喺新加坡菜。之前去新加坡食過嘅黑胡椒蟹，夠晒濃味。今次嚟到先叫一個差唔多嘅”黑胡椒辣椒老虎蝦” $188 過下口癮。雖然只係過口癮，但其實啲蝦好大隻，六隻虎蝦，連同蝦頭同非常濃味嘅黑胡椒辣椒汁，真係可以食返當地嘅味道。跟住我哋叫咗個比較少見嘅”白雪牛油骨” $128。豬排骨上面有好香嘅奶油、椰絲同奶粉。食落去又好輕微嘅甜味，但主要嘅味道其實係奶油。豬排骨質感鮮嫩多汁，又容易咬，其實我本身好怕啲好難嚼嘅骨…跟住我哋叫多兩杯凍飲。分別係”美祿爆炸” $58 同”玫瑰露恐龍” $48。基本上就係有一堆美祿粉嘅特飲😂。但你咪理，”美祿爆炸”，口感豐富，甜味出眾，唔淨止解渴仲可以用嚟解辣。”玫瑰露恐龍”就有好豐富嘅玫瑰味，可以睇成係玫瑰latte加美祿粉嘅組合，色彩鮮艷。平日夜晚嚟呢度都幾多人食，我比較欣賞佢嘢食靚靚仔仔之餘都坐得幾舒服。濃味嘅嘢食，總係有佢嘅吸引力。