雞功房 (世瑛大廈) (已搬遷) 新店位置

早排听朋友讲，上环有间隐世私房菜，难得今日收早去中环等埋男朋友收工，终于有机会去试下。原来呢间嘢每个月都会转一次菜单，而今次一月份菜单嘅其中一个主角系龙虾，真系开正我𠮶瓣呀！平时去饮，成日都食百花酿蟹钳，但水准就系好参差。而今次呢味酿龙虾钳，啲虾胶比例做到啱啱好，足料弹牙，唔会觉得捞咗好多粉；至于只龙虾钳，就真系好难会唔好食啦。之后上嘅龙虾忌廉汤，真系好味到爆晒灯，个汤够晒香浓之余，仲要有啖啖龙虾肉，极之足料。另外，呢个汤系用杯上，厨师仲系上面特登加咗啲泡，骤眼睇以为自己饮紧Cappuccino。好戏在后头 - 蟹粉扒龙虾球，虽然卖相唔算好精致，但系蟹粉、龙虾球（唔系龙虾丸）同豆腐三样嘢味道真系同口感好夹，而D蟹粉食完，真系会齿颊留香除咗三味龙虾之外，呢味最值得推介嘅系药膳慢煮和牛，和牛肉质够晒腍之余，个汤仲要够晒甜，仲要同药膳味出奇地夹。据大厨所讲，和牛系用咗面珠墩慢煮咗6粒钟，而药膳就用咗红枣同埋加咗少少当归，唔怪得之食完个身咁暖粒粒啦。由于九道菜系逐个上，所以食呢餐真系好似去饮咁，食足2个几钟。而我同男朋友都好钟意呢个私房菜上下嘅服务态度，特别系大厨会出嚟分享下心得。