Olive Cafe (已結業)

今晚我们喺大埔中心附近做完嘢之后，行咗大埔超级城𠮶边睇吓有咩食？行到去见到一间「Olive Cafe」嘅门口有好多人排队等位，心谂应该啲出品系几好，所以我们都谂著喺度食晚饭！点知喺排队等紧𠮶阵发现，原来店内有好多坐位都无人坐，等就要人客喺出面等位，难度店主想制造好多人客喺外面排队等位嘅效果？等咗起码大半个钟以上先安排到入坐，就算安排咗我们入坐之后，都仲有好多位，但都唔安排其他人客入坐，真系令人摸不著头脑呀！我们叫咗几个晚餐分别系：西班牙黑毛猪肉眼扒配法式香草酱嘅肉质都几松化，而且唔会硬实，但味道就唔算好香浓！香煎西冷扒6安士配洋葱汁都几够份量，而且都几厚身，肉质好松软，肉味亦好浓郁，但脂肪嘅比例就过多，感觉相当肥腻！香橙焗大西洋三文鱼配杂菜天使面系放咗一块薄薄嘅橙片喺三文鱼扒嘅面一齐焗，所以食落嘅感觉好清新，肉质亦好嫩滑，天使面嘅面质都几烟韧，而且唔会过腍！是日餐汤：忌廉汤就不过不失，唔算系好出色！杂菜沙律嘅沙律菜好清甜爽脆，而且清洗得好干净卫生！至于龙虾浓汤系要另加$38，喺落单𠮶阵，店员同我们推介话系必食嘅，所以我们就叫咗嚟试吓，汤底都几香滑浓郁，而且味道都几鲜味！