華苑酒家 (已結業)

有闻妈咪屋企附近有一间酒楼夜晚时段嘅边炉任食都只系138蚊，仲要唔使加一兼啤酒任饮，咁抵即刻叫佢落嚟一齐试下先。唔好以为佢收138蚊就流流啡㖞，净系汤底都有成11个选择，加埋30几款任食火锅配料同埋 青岛森堡任饮，净系见到张餐牌纸都觉得抵番哂。喺11个选择之中拣咗醉鸡汤底，估唔到碟鸡有咁大碟，汤底相当足料，有淮山杞子牛蒡红枣同埋圆肉，够哂滋补养生，鸡肉嫩滑，如果再醉啲嘅话应该会更好。酱料嘅选择都唔少，特别喜欢右手边嘅豆瓣酱同埋xo酱。脆肉鲩系估你唔到咁肥大，仲要好厚身，块块新鲜爽脆，加少少浸过豉油嘅香葱蒜蓉同埋辣椒就系最佳配搭。肥牛十分肥美，胆固醇万岁。呢度竟然有猪润同埋猪肺嗌，猪润色泽红润，一睇都已经知道系新鲜货；猪肺飞过水，唔使渌好耐就食得。食到个肚好饱都未试哂咁多款式，又有藉口再嚟多次。