角落 三二 (已結業)

奥海城行完街，之后去大角咀揾嘢食，几年冇黎大角咀，依家变到好似食街咁旺，睇到呢间有人排队，二话不说就锁定鸟。因为饿到一个点，所以餐牌入边样样都想试。炸鱼薯条沙律白身鱼混咗调味先炸，香口唔死咸，薯条系我最爱粗身个种，外脆内软，沙律菜非常新鲜，配埋黑醋汁，清新醒胃。芝士流心蛋大啡菇配意大利饭铁板上热辣辣，咪睇个样平平无奇，一切个大啡菇蛋汁爆出黎真心坚秋，意大利饭湿润程度刚刚好，有咬口但唔会太硬。非一般的辣黑椒意粉配猪手真心！非一般的辣！程度似放咗半樽黑椒！同餐厅职员倾计，先知之前再辣一啲，已经听取意见改良过，撇除辣意粉煮得好弹牙，不过猪手切片上份量略嫌少。蜜糖/韩式鸡翼上枱𠮶阵黑蚊蚊好似卤水鸡翼咁，但食落充满蜜糖味，好似用蜜糖腌左一段时间；另外韩式鸡翼其实就系蜜糖鸡翼上面加一啲韩式辣酱，原本以为好似 oppa 炸鸡加韩式辣酱，同我想像中有少许出入，都系蜜糖鸡翼好食啲。椰汁雪条菠萝沙冰 & 冰蜜糖菊花特饮推！心机制作，跟餐只需要加＄25好抵饮。小本经营，睇得出好有诚意去提供食物俾客人，下次可以再试。