堂記腸粉專門店 (已結業)

星期六，寒冬前的周末。太座有幾間心水食店，可惜經公仔箱介紹過之後，生意大增，等候時間極長，渡船街嘅「堂記」便是一例。是晚興之所致，就算等一吓都冇傷肝。差不多十一點嚟到，人客依然眾多。找了路邊兩個位子，隨即落了單。等了又等，見師傅於廚房中不斷拉粉皮，不斷切腸粉，有限嘅煮食具，有限嘅人手，算來大概每五分鐘才能造起兩碟腸粉，幸好有鴨腎菜干豬骨粥($14)裹腹。菜干豬骨煲到糜爛，入口鹹中有豬骨嘅鮮甜味。當中有幾粒鴨腎，既經濟又醫肚，好吃！等到十一時四十五分，所點選嘅叉燒腸($13)及豬膶腸($13)終於有得食了。叉燒是帶一點煙燻味，肥瘦適中；豬膶鮮甜，咬落爽脆。即拉腸粉依然是功架十足，皮薄且軟滑，咬落還有嚼勁。其實以此腸粉，配什麼餡料甚至乎齋腸也十分好吃。落嘅單多，造腸粉嘅師傅只得一個，漏單情況偶爾發生。要等四十五分鐘先有得食，值唔值得便見仁見智。不過食貴乎隨心，有閒情。好東西，有些時候是要付上時間的。