牛蓋 (已搬遷) 新店位置

收工本来想到因为一张告示而成为屯门区群组焦点嘅杂大大开餐，可惜光头老板话坏咗雪柜，要到再过三几日先有机会重开。唔紧要，即时想起同场另一家人气小店 - 牛盖。用扶手电梯落到地下就见到个牛招牌，原来系陆她娜旧铺位，难怪网上一直讲小店，小得只十多个坐位，要自己点餐取餐还餐具。步入店铺只见老板一人对住炉头忙碌工作，无第二个伙计，正宗一男子小店，稍稍等咗一阵先可以点餐。晚饭时间，大约等咗15分钟先轮到我取餐。取餐时发现老板先张慢煮好嘅牛扒放上火炉，稍为烤烘，再切片上菜，见到呢个过程再配合传嚟嘅香气已经令人狂吞口水。第一次叫咗个大份牛扒盖饭(220g)，餐牌上写住牛扒系慢煮美国安格斯牛肩肉。饭面铺上满满牛肉，牛肉无因为要外观上好睇而切得过簿。慢煮过后保持住本身肉汁，咬落鲜嫩有嚼口。经过烤烘，更能发挥油脂香味，外围烧得焦香微脆，有如㶶边叉烧嘅效果，食得更过瘾。汁系带甜嘅烧汁，味道同外间普遍食到嘅唔同，配上牛扒本身肉汁同油份，要食晒成碗饭并唔系难事。食得出货真价实嘅美国牛肉，份量同质量并重，$88价钱绝对合理。下次要再嚟试一下皇牌极上牛盖饭(慢煮牛小排)。