Muse Furniture Lab (裝修中)

呢间cafe最近翻新咗，位置有啲偏僻，喺西铁锦上路站再搭巴士入去。留意返食之前一定要book位先，同埋冇得拣坐室内定室外。我哋就系大热天时被安排坐室外嘅幸运儿，食到满头大汗，怕热嘅就等天气凉啲先嚟喇。大热天时紧系饮冻嘢，推介呢杯樱花白桃梳打。真系有朵樱花，仲要喺嚿冰入面，啱晒打卡！白桃切成一口size，加埋有气梳打，爽呀！头盘章鱼烧同烟三文鱼沙律，两样都好足料好好味，不过沙律可以再落多少少汁。主食拣咗烤鸡肉配车打芝士法式可丽饼同蒜片辣椒榄油大虾意大利粉。平时我钟意食甜嘅可丽饼多过咸嘅，但呢个有惊喜，又靓又好食，饼皮够薄带少少焦香，鸡肉够嫩有咬口，再加埋芝士，味道更加提升。而个意粉好啱我呢啲钟意食辣嘅人，唔食得辣就唔好拣呢款喇。蒜加辣好香口，睇落冇咩汁，但原来好够味，虾肉好爽👍🏻最后甜品系歌剧院蛋糕。卖相几有艺术感，仲有几片金箔同花瓣，显得有点儿高贵，又可以打卡，味道系浓郁嘅朱古力，唔腻，可以自己食晒成个。食饱可以行出室外，餐厅整咗几个setting畀客人影相，又食又玩几值得咁远水路入嚟。