PizzaExpress (皇后大道西) (已結業)

临近12月，四周围已经开始有圣诞气氛，所以我都即刻约咗朋友，去西营盘嘅PizzaExpress 正式开始食圣诞大餐。打开张圣诞咭咁嘅Menu，我同朋友拣咗好有节日气氛嘅面包球圣诞树、健康嘅黑醋油封鸭腿血橙沙律、同睇落好吸引嘅意式龙虾海鲜汤粗管通粉。圣诞树面包球质感有啲似Pizza批，上面铺咗层芝士同辣肉肠，仲加咗少少芝士粉同香草。就咁食又得，点埋辣酱同香草酱就更惹味，作为前菜一流。餐厅仲好有心思咁摆多咗一粒星形嘅包喺火箭菜上面，好似一棵圣诞树咁。黑醋油封鸭腿血橙沙律有红菜头、车厘茄、血橙同牛油果，用料非常新鲜。油封鸭腿嘅油分适中，唔会太干身，配合甜甜酸酸嘅黑醋一齐食又唔会太油腻。沙律嘅份量比想像中多，两个人分都够食。意式龙虾海鲜汤粗管通粉有半只龙虾，非常吸睛。通粉其实仲有其他海鲜，有青口、蟹肉同虾，绝对值回票价。龙虾汤味道浓郁之余带有蕃茄嘅甜味，同时加咗车厘茄同少少辣味，令到味道更有层次。龙虾几好肉地，又有虾膏同虾子，增加风味。觉得唔够喉，我同朋友再追加左一个 Tiramisu，Tiramisu嘅Cream好幼滑，亦有阵阵咖啡味，酒味唔系咁重，上面仲有粒士多啤梨，小朋友食都好适合。