夏娃 (已結業)

天文台话黄昏会挂8号风球，于是就趁住仲系3号风球嘅公众假期下午出去四围游走，嚟到呢间喺炮台山同埋北角之间嘅德国小餐厅有咁好彩遇着落大雨，于是入去避雨兼休息一下。我哋叫咗个Nachos同一人一杯德国啤酒，渡过一个悠闲嘅公众假期下昼。Menu上面有Nachos幅相但系又唔见有Nachos呢个item同埋价钱，由于我个friend好想食，于是就问waiter有冇得嗌同埋几钱，佢覆返$68 ，于是我哋就叫咗。个Nachos份量都ok，最正系佢配晒牛油果酱、芝士酱同埋莎莎酱，唔似出面通常只有两款酱，我钟意佢个芝士酱因为真系好香，我朋友就话个牛油果酱好正。德国啤酒我就拣咗Schneider Weisse Tap 5，因为本身钟意有水果味嘅啤酒，佢呢一只啤酒嘅菠萝味真系好香好好饮。我朋友就拣咗有只Kostritzer嘅黑啤，我试咗一啖，味道都唔错，佢系属于淡味嘅黑啤，冇G字头𠮶只黑啤𠮶种咁嘅苦涩味，几易入口，真系唔错。