水晶晶泰國餐廳 (已結業)

做完运动经过呢头，见到$68蚊任食午餐，58蚊任食下午茶，对于呢个饿到hihi 既moment黎讲，我谂都唔谂就狗冲左入去。对于呢个价钱黎讲，一入门口大家都估到咩事。人山人海，一只只饿狼系个门口虎视眈眈等开波。今日系闲日，星期三既两点，都多人成咁。好啦一开波既时候，万人空巷，插针都插唔入，对于打开rugby又做开gym既我，心谂食硬你，点知一山还有一山高，左边一个呀叔批肘，右边一个大婶头锤，高手在民间，只好乖乖的等第二轮比班饿狼先食。有图有真相。食物就好多款，不过系狼群之中好难影相，只好拎完野先返埋位慢慢影。炒饭几好，菠萝多汁，鸡肉同炒饭既功夫正常出品，整体黎讲正常。凤爪都系果只味，几好。烧鸡扒比海南鸡好味，香口一点，都系正常口味冇特别好唔好食。呢个鱼蛋，拎我摇身一变成为食神「鱼蛋唔弹牙，咖哩冇咖哩味，鱼蛋冇鱼味」最后食番个西米露作结，都系正常出品。总计黎讲，野唔算好食，但绝对抵食到烂。$58食到饱。