木屋小食店 (已結業)

听闻呢间位于街市嘅拉面小店有一段时间，但因为懒所以冇特登去揾食，早几日终于的起心肝去寻宝。中午时间，小店处理非常多嘅外卖，亦有好多学生哥同街坊帮衬，所以耐心等候师傅煮面。面饼估计应该系由中央工场制作，见师傅只系将面饼放入唔算大滚嘅热水渌面，并冇用什么计时器量度渌面时间。然后切叉烧、切糖心蛋放喺面上面，再放汤，再放上葱花，最后加两块紫菜，碗面就上枱。从卖相嚟睇，各样材料排得好靓，一丝不苟。第一件事，饮啖汤先， 从佢舖头嘅logo可以知道佢系用鱼干熬制汤头，但饮一啖即刻知道咩料，味道算鲜甜嘅，但都几重味精！跟住食啖面，唔错㖞，软硬适中，有少许烟韧咬劲，好啱个人口味！糖心蛋冇乜特别，并唔系用酱油腌制嘅味付玉子，只系普通嘅溏心蛋，但火候控制得好好，溏心好靓！到慢煮叉烧，果然做到慢煮嘅效果，一啲都唔鞋口，好软熟，咬落有淡淡嘅咸香肉香！笋嘅味道正正常常，唔会有腥味，而葱花胜在唔系用青葱，否则就大煞风景啦！$40一碗拉面嘅价钱，真系冇乜嘢太苛求嘅地方，但佢仍然一丝不苟做出$40应有嘅水准，除咗个汤底味精比较强烈之外，实在系值得大赞cp好高！而且，感觉就好似喺日本街边食拉面车仔档嘅风味！