客滿庭

营业中

休息中

夜晚经过葵芳广场，见有客家菜，朋友话不如试吓，其实自己都几钟意客家菜嘅味道。晚上嘅餐牌主打都系套餐，真系丰俭由人，视乎你想点配搭，总会拣到钟意嘅组合。两个人想平平哋，最好就系食孖宝：一条细沙巴趸＋一个𩠌。格价完毕之后，朋友发现配搭当中食客家盐焗鸡系最抵食，因为盐焗鸡散叫嘅价钱比其他配搭贵，所以孖宝套餐里面配搭盐焗鸡，然后散叫客家酿豆腐，啱晒数，抵食！讲返食物嘅质素，条沙巴龙趸好新鲜，蒸嘅时间啱啱好，刚刚离骨，豉油调味唔错，适中唔太咸，整体上对条鱼好满意，但沙巴趸就预咗啲肉唔会太有鱼味，因为始终系养鱼。好耐未有机会食过呢种真正明火焗过嘅咸鸡，对上一次食应该系喺大澳嘅东方小祇园，呢种煮法嘅客家盐焗鸡唔系净系包纸放喺盐堆里面焗，即系东江大饭店或者醉琼楼𠮶种，而系真正用明火焗过所以特别有咸香味！但对鸡肉就冇期望，因为明知佢系冰鲜鸡，肉质唔算嫩滑，但可以接受。最后系客家酿豆腐，呢味𩠌见到系枱枱都叫，所以跟队；但原来系用铁板上，有啲失望，因为正宗嘅好多时系用砂锅上。味道方面正常。但印象记得细个有食过另一个版本系用油豆腐做，比较喜欢油豆腐版本。但而家酒楼上菜一定考虑卖相，用嫩滑豆腐一定美观啲。