baby café (已結業)

原本想点Set，因为唔驶特别去谂食咩好，但朋友见到散叫食物的相好吸引，于是提议叫。最后我哋点咗3碟主菜之余，仲点咗个甜品。墨西哥辣茄酱茄子墨汁意大利粉，茄子好煮得淋，而墨汁意粉果然够晒黑，够辣好香口。鲜茄忌廉梭子蟹意大利粉，真系同张图一样，有成只蟹盖! 意粉带有蟹味，侍应好细心比埋蟹钳，虽然食蟹比较麻烦，不过只蟹好新鲜。值得推介系菠萝烧汁西班牙黑豚扒配紫薯，黑豚扒肉好鲜嫩，又啖啖肉大大块，紫薯就整得好滑，又好有浓郁的蕃薯味，赞!特制朱古力布朗尼，单望卖相已唔错啦! 布朗尼仲微热，好松软。值得一提系，原来CREAM入面有旧云呢拿雪糕，连埋布朗尼一齐食，味道好夹，又可以中和腻感，而且令布朗尼更湿更易入口。整体食物真系唔错，都好满意，下次再嚟试吓个Set先。