El Cerdo (大壩街) (已結業)

荃湾广场对面有间El Cerdo，门面睇落唔平，不过细心睇过餐牌后价钱其实唔太贵，呢晚就去试试。其中一面墙上系一幅用反光物料砌成嘅巨型画作，细心咁睇原来系只黑毛猪图案。连餐垫纸都印咗黑毛猪图案，同埋列出唔同部位嘅西班牙文，似乎黑毛猪系佢哋嘅招牌菜之一。试咗Mojito，餐牌写采用冧酒、鲜青柠汁、薄荷叶、糖同苏打水调出嚟，酒味唔浓，对女仔或少饮酒嘅人嚟讲比较易入口，薄荷叶同鲜青柠嘅配搭又够清新。然后系份量的骰嘅tapas，先嚟嘅系炸黑毛猪火腿球。吉列皮炸得金黄香脆唔油腻，内层就系5J级黑毛猪火腿碎同软白汁，口感creamy，似晌度食紧极之软身嘅忌廉薯蓉咁，又有啲似中式嘅炸鲜奶，味道唔错。脆皮猪腩肉配蜂蜜蛋黄酱，猪腩肉嘅猪皮、脂肪同猪肉层次分明，猪皮脆卜卜，猪肉松化唔痴牙。蜂蜜蛋黄酱就加咗蒜蓉，酸酸甜甜咁可以减去腻感。最后仲试埋传统洋葱薯仔西班牙奄列，用咗洋葱、马铃薯同鸡蛋等煎成厚身嘅圆形。煎得外层焦脆，切片马铃薯同洋葱丝软腍，最内层仍然湿润唔干身。感觉上食物质素几好，以同类型餐厅嚟讲定价唔贵，如果晌九龙或港岛区应该要多三分一至双倍价钱，CP值都几高。