Little Old Town (已結業)

好耐之前喺依间餐厅食过一次肉骨茶，到依家仲念念不忘。今日难得经开九龙湾，于是就黎重温番肉骨茶。今次我地除左点左肉骨茶，仲点左菠萝海鲜炒饭同埋两款甜品—西米糕、千层糕。依度嘅肉骨茶系成个炉上，下面有火㷫住肉骨茶，所以个肉骨茶食到尾都系热辣辣，冬天食好保暖。肉骨茶汤底重药材味，再加少少黑胡椒嘅辣，非常开胃。肉煲得好软腍，好入味；豆卜同油炸鬼放入汤度索晒汤入面嘅精华，简直系食到停唔到口。今次我另外叫左一碗鸡油饭，饭虽然睇落淡色，但系味道十足，非常惹味，配上肉骨茶格外好食！菠萝海鲜炒饭卖相吸引，睇落唔太油。至于味道方面，由于我无试到嘅关系，所以系无从得知。甜品方面，左边嘅西米糕入面加入左芋头，味道略甜，不过依个唔系我食过最好食嘅西米糕。千层糕反而有惊喜。其实依个千层糕可以话系无乜味，唔系好甜，但系食落有淡淡嘅香味，咬落口感非常烟韧，值得推介。